[2009-12-23]
上周美元反彈引發避險交易，削減對風險資產的需求，而花旗集團大規模批股集資亦令股票市場受壓。
先講美元，聯儲局上周三公布的利率聲明表示，將在明年2月結束大部分所謂量化寬鬆的緊急借貸工具計畫，雖然聯儲局這個行動只是按先前講明的時間表行事，並非新安排，不過仍然令投資者覺得美元供應將減少，美元轉強，資金抽離股市，國債亦持續走強。
資金避險 美元反彈
主權國債務危機亦係另一個推高美元的因素，雖然杜拜問題已經舒緩，但標準普爾調低希臘的主權信貸評級，將其評級由A-調低到BBB+，並稱言若情況惡化，會進一步調低評級。另一評級機構Fitch在上周二已將希臘評級調低到BBB+，希臘先後被調低評級，令市場擔心歐羅區部分成員國的公共財政狀況，憂慮另一場全球性債務違約危機可能再度爆發。
奧地利在上周一已將Alpe-Adria銀行國有化，並注入6.5億美元去拯救這家銀行，奧利利的情況亦受人關注。
Travelex Global Business的高級市場分析師Omer Esiner表示，「美元今日的反彈受多種因素合力影響，包括聯儲局對美國經濟的樂觀聲明，令多數人認為美國將提早恢復正常的貨幣政策。市場對希臘的擔憂加重，亦令歐羅承壓，希臘可能是歐羅區更多國家財政問題的縮影。」
管理層只為「發花紅」
美股方面，另一大壓力來源是花旗的大批股。花旗發行205億美元證券出市場，集資還錢畀美國政府，以3.15美元定價批出新股，由於這是美國有史以來最大的集資，無深度折讓，市場唔肯要貨，終於令花旗定了這個低價批股出街。
由於花旗批股的定價低於美國政府售股的目標價3.25美元，美國政府最後決定唔沽出她手上持有的50億美元花旗股票，三個月後再算。
上周花旗新股出街，出現巨量成交，有超過四分一新股轉咗手。交易員大罵花旗累街坊，話佢哋管理層貪婪，趕住今年尾前批股，只係想集資還錢畀政府，逃避受政府監管發花紅，又批評美國監管機構為甚麼畀佢趕住批股出街。
我就覺得管理層的確係貪婪，但係監管者卻有不同角度，因為畀埋花旗和富國銀行批股還埋債後（富國新股又會出籠），美國大銀行還債還得七七八八，這就等如洪鋒一樣，市場頂得順就畀佢快啲過，否則有咁巨大的集資懸劍在頭上，一來股市不會好，二來若市場環境轉差，想叫銀行集資還債都集唔到。
中綫發展屬好事
凡事都有兩面睇，美股捱得過呢浪集資潮，銀行還番大筆錢俾政府，美國又會健康啲，起碼財赤少啲，政府手上子彈多啲，或許這也是炒番高美元的另一因素，但中綫卻是好事而非壞事﹐當然短期內股市就要捱吓。
陸羽仁 |
发表于 2009-12-24 02:16
|